с. Керчомъя

Бать йылысь казьтылӧм

Василий Степанович Уляшев батьным чужлic Керчомъяын гӧль семьяын. Мамыс кувлӧма кага вайигӧн. Быдмис ичинь водзын. Дерт, эз тӧдлы мамлысь радейтӧм да мелiлун. Сюрлic быдторйыс. Но быдмис статя, мича да уджач мортӧн. Нэм чӧжыс быдлаын тӧдчис сылӧн киподтуйыс. Вӧлi тэрыб воськола. Йӧзлӧн висьталӧмысь кывлi: моски кузя мунiгӧн пӧ кок шыыс кывлic катыдсянь сикт шӧрӧдзыс. 18 арӧcӧн (1914-ӧд воын) босьтicны царскӧй армияӧ. Bӧлi медводдза мирӧвӧй война вылын, воюйтic коннӧй кавалерияын. Гражданскӧй война дырйи дзонь нёль во воюйтic и Гӧрд армияын, бара жӧ кавалерияын. Сизим во эз волы гортас, тышкасис Кайзерлӧн салдатъяслы да еджыдъяслы паныд. Гортас воис 25 арӧсаӧн.

Семьяас чайтicны, мый ыджыд пиныc пуктic юрcӧ война вылын, эз нин виччысьны гортас. Та вӧсна, кор чужис пи, пуктicны нимсӧ Вась. Тадзи лоис кык Вась, кодъяслӧн нимныс вӧлi Ыджыд Вась да Дзоля Вась.

Гражданскӧй война бӧрын бать гӧтрасис зэв мича ныв вылӧ (кывлi йӧзлӧн да мамлӧн сёрниясысь). Шуисны Августаӧн. Но олӧмныс эз артмы. Нывбаба кувсис кага вайигӧн. Колис Анатолий пи (сiйӧ трагическӧя кувсис 1975-ӧд воын).

1927-ӧд воын, кор батьлы вӧлi 31 арӧc, гӧтрасис 18 арӧса Александра Ивановна Самарина миян мам вылӧ. Толя вокӧc быдтiс ассьыс моз жӧ. Аслас челядьыс эз вӧвны 13 во, cӧмын 1940-ӧд воын чужиc медводдза Юрий пи. Сiйӧ тшӧтш быдмис зiль да шань мортӧн.

Регыд мысти пансис Великӧй Отечественнӧй война. Фронт вылӧ кутiсны нуны и томъясӧс, и олӧмаясӧс. Воис ӧчеред батьлы. Кулӧмдiнса военкомат босьтic сiйӧс 1942-ӧд вося февраль 2-ӧд лунӧ. Апрель 24-ӧд лунӧ нин петic фашистъяскӧд чорыд косьӧ. Воюйтiс 28-ӧд Краснознамённӧй Невельскӧй дивизиялӧн 144-ӧд стрелкӧвӧй полкын ездӧвӧй транспортнӧй ротаын. Киев кар дорйӧмысь сылы сетicны «За отвагу» медаль. Батьлӧн вӧлiны и мукӧд медальяс, но кутшӧмъяс, висьтавны ӧнi oг куж. Батьлӧн фронтӧвӧй туйыс пансис Великие Лукиын, а помасис Австрияын, Линцы карын. Гортас воис 1945-ӧд вося сентябрын. Ставсӧ куим война вылын вӧлi 11 во.

Локтӧм бӧрын уджалiс Керчомъяын колхозса председательӧн. 1976-ӧд вося сентябр 29-ӧд лунӧ чужиc Виталий пи. Сы йылысь, дерт, тшӧтш позьӧ уна гижны, ӧд oлан туйыс вӧлi бур, быдсяматор вылӧ озыр. Ми школасяньыс кыпалiм сыӧн.

1950-ӧд воын батьнымӧс ыстiсны уджавны Вилльӧ, кодi вӧлi Пруптса леспромхозлӧн юкӧнӧн. Сэнi олicны вайӧм йӧз – некымын немеч, Рытыввыв Украинаысь ыстӧмъяс, «власовецъяс». Вель унаӧн вӧлiны и керчомсаяс. Но олiсны лӧня, ёртасьӧмӧн.

Тайӧ посёлокын 1951-ӧд вося июньын чужи ме, семьяын ӧтка ныв. Батьлы сэки вӧлi 55, мамлы 43 арӧc. Вилльын миян семья олiс 11 во.

Бать уджалic Пруптса леспромхозын завхозӧн. Сылӧн дӧзьӧр улын вӧлi зэв ыджыд овмӧс, кытчӧ пырисны Лӧгинъяг, Мӧскашор, Виль, Чипсись, Гараж, Зимстан вӧр участокъяс. Кывкутiс став производственнӧй овмӧс вӧсна. Ме помнита уна складъяс, техника да весиг вӧвъяcӧн конюшня. Батьлӧн ставыс вӧлi дзим-дзурк. Нӧшта помнита, кыдзи вӧчлiс отчётъяс. Тшӧтi мольясӧн быттьӧ чачаӧн вopcic, кӧть помалic cӧмын нёль класс. Бать эз тӧдлы шойччан лунъяс да весиг ӧтчыдысь эз петавлы отпускӧ пенсияӧдзыс. Нӧшта кывкутic заправитчӧм вӧсна. Ыджыд цистернаяс сулалicны лыа пиын Прупт ю пӧлӧн. Налысь пыдӧсъяссӧ бать да мам весавлicны пытшкас пырӧмӧн ведраяcӧн. Петавлicны сэтысь кольмӧм тӧрӧканъяс моз. Гажа юрнас (татшӧмыс вӧлi зэв гежӧда) бать висьтавлic ассьыс олӧмсӧ. Корсюрӧ синва сорӧн. Нӧшта сылӧн вӧлi люмень пань, зэв нин важ да вӧcнялӧм. Воропас вӧлi гижӧма кадпас. Тайӧ паньсӧ бать новлӧдлӧма куимнан война вылас.

Помнита, меным вӧлi ар квайт, мамкӧд локтiм вӧрысь, вотчанiнысь (позьӧ шуны, ме быдми вӧрын да ю берег дорын). Бать сёрнитic Алексей Степанович Тимушевкӧд. Сiйӧ тшӧкыда кежавлic миянӧ. Меным чайтсьӧ, сiйӧ сэк уджалic «Вӧр фронт» газетын корреспондентӧн. Бать пукалic улӧc вылын ӧшинь улын, а миянӧc, челядьӧc, Алексей Степанович сувтӧдас батьлы воча (батьлӧн киас вӧлi паньыс) да фотографируйтic. Шуис, мый снимокыс да гижӧд петасны газетын, а паньсӧ босьтic сьӧрсьыс. Кӧсйис сетны музейӧ. Та бӧрын паньсӧ ми эг аддзылӧй.

Нӧшта помнита, Победа лунӧ бать пасьтавлic костюм, пысавлic медальяс (дерт, сё грамм юыштӧм бӧрын) да петавлic посёлокӧ. Том йӧз кытшавлiсны сiйӧс, босьтлiсны ки выланыc да кыпӧдлicны вывлань «ура» горзiгтыр. Ме котралi на гӧгӧр да бӧрдi, полi, мый уськӧдасны. Та мында славасӧ и тӧдлiс 11 во воюйтӧм бӧрын. Но и та вылӧ нимкодясис.

1961-ӧд воын бать петiс пенсия вылӧ. Вуджим овны Керчомъяӧ, выль керкаӧ, кодӧc кыпӧдicны бать да ыджыдджык Юрий вок. Но овны сэнi батьлы дыр эз мойви: 1963-ӧд вося декабр 3-ӧд лунӧ сiйӧ эз ло. Сылы вӧлi 67 арӧc.

Ме этша олi батькӧд. Сылӧн кувсигӧн меным вӧлi 12-ӧд арӧc, а Витя воклы 17. Дерт, вӧлi кӧ ыджыдджык, гашкӧ, унджыктор юаси сылысь. Став тайӧ гижӧмторсӧ тӧдмалi мамлӧн сёрниясысь, мыйсюрӧ помнита батьлӧн висьталӧмысь, мыйкӧ кольӧма челядьдырся вежӧрӧ.

Ӧнi семьяысь коли ӧтнам. Вокъяс мунiсны, налы Енмыс сетлӧма дженьыд нэм. Сьӧлӧм бӧрдӧ на вӧсна, но нинӧм он вӧч. Синванад некодӧc он бергӧд. Колӧ овны водзӧ.

Капитолина КУЗНЕЦОВА (УЛЯШЕВА)

Снимокъяс вылын: Василий Степанович Уляшев1914-ӧд да 1961-ӧд воясын.

Керчомъя.

 Парма гор, 2019, Май 4 лун (18 №).

 © Усть-Куломская межпоселенческая библиотека